攝影 京都之旅 - Sony FE 24-70mm F4 OSS Zeiss
今次京都之前，我係冇變焦鏡頭，全部都係定焦鏡，連唯一一枝既Sony FE自動對焦鏡頭，都係28mm F2。 當初買28mm F2係因為要合照，當俾部相機人幫手影相時用，真係唔多人識同你手動對焦㗎嘛。所以之前一般會帶三支鏡，Sony FE 28 F2、Leica 50 F1.4同Leica 90 F2（定係2.8），成日換鏡都幾麻煩，不過光圈大同畫質好好。 今次唔想太麻煩，上網研究下，最終基於價錢、重量、大細、質素、方便、range既考慮，買左支Sony FE 24-70 F4 OSS Zeiss。依支standard zoom lens係Zeiss出品（定合作？），用Zeiss鍍鏌，鏡有防手震，而且重量同大小係眾多Sony既standard zoom鏡群中係最輕同細（雖然都唔係好細）。 上網睇過拍出既相片質素幾好，但就話對焦慢。支鏡已經係十年前既產物，光學同motor技術既進步不少，當然不能同近年出既鏡頭比較。但因我用Sony A7C II，相機都係上年先出，配依支鏡頭對焦非常快，唔覺同啲新鏡頭有好大分別。 F4光圈係真心唔夠，有啲場境想淺啲景深做唔到，晚上手持要頗高ISO，幸好依家Lightroom個AI Denoise太厲害，用到幾萬ISO都還可以。 京都依七日，zoom鏡好方便，好多時都會用50-70mm影景，用35-50mm街拍，用24mm手持拍合照。拍到既嘢係真心多左，質素會唔會好得過Leica 50 F1.4，咁梗係冇，冇個種feel啦。尤其今次京都人多到以前旺角一樣，用zoom鏡就更方便，可以盡量避開人群入鏡，唔駛人肉zoom。 最令我驚訝，係去伊根舟屋既遊覽船，依支鏡加上Sony A7C II既AI 對焦，可以追焦海鷗同鷹，非常快同準（冇用連拍，係續張拍）！只係一支十年前，二手三千頭就有既鏡頭！如果用Leica M鏡係冇乜可能影到… 今次都有帶Leica 50mm F.14同LM-EA9（令Leica M鏡可自動對焦，不過幾慢下），不過只係去Outlet時冇乜嘢影個日用過。 買左一支zoom，令我重拾攝影既樂趣。