俾我由頭鬧到尾既《太平紋身店》
睇左ViuTV三套劇，《男排女將》、《暖男爸爸》及《二月廿九》，係各有特色，而且好有水準，好有電影感，就算劇中有啲演員好新，未必演得好好，但至少真係見得到誠意，令人覺得值得支持。 之後《熟女強人》，睇左一集唔啱channel，就冇睇。知道就嚟有套《太平紋身店》，好期待，新年期間十五集全上架，就開始睇。 我諗好少有一套劇，會幾乎由頭鬧到尾…真係好失望！ =========================================== 好做作，好想拍到好有型，好淒美，但係真係好頂唔緊，大佬，真係太多冇邏輯既情節同處理，只係為型或者淒美而拍出嚟。我有啲覺得係拍俾CCTVB觀眾睇…觀眾會諗合唔合理，唔係你想點拍，觀眾就接受，咁樣應該去CCTVB播，唔應該係ViuTV播。 我唔知係個劇本問題定係導演有問題，講故事能力好弱，好多嘢其實交待唔到。嗱，係咁架，佢一見鍾情呀，三唔識七救佢好合理架…第一個故仔，兩女爭一男，大佬呀，可唔可以揾個就算唔靚仔都有型啲既演員呀，真係投入唔到…對於太平街個幾個有幾咁勁，真係睇唔出，原本玩音樂同做清道夫既WiFi點解有咁勁既資訊搜查能力，冇交待，總之就係勁啦，你唔好理… 劇中既藍龍幫同黑虎幫由天地幫分裂出嚟，但係成套劇都冇交待天地幫之後點，好似消失左。仲要成班藍龍幫同黑虎幫，無論話事人同手下，都係中學啱啱畢業咁，你拍童黨咩！唉…最後兩幫要殺入太平街，以為係成套劇既高潮，點知係反高潮，最後竟然天爺一拳一腳打低左兩個話事人，咁兩幫人就走左… ========================================== 仲有太多好hea好求其既位，例如女主角有個上臂到下臂好大既紋身，應該係左臂，但竟然有一段戲個紋身係右臂。天爺個仔既墓碑係條馬路邊，都唔緊要，個發泡膠墓碑真係好流，真係好求其，似以前EYT趣劇啲道具，仲要成日拍天爺夜媽媽去墓碑前坐，想拍到好有feel好型好淒美，但係你睇住個咁流既墓碑，點型呀？！點淒美？！你只會覺得好好笑，唔會投入到個氣氛。 最尾女主角報仇個場，有個好似扮李小龍咁既打手，中左刀跌落地，個鏡頭低位影佢跌落地，大佬地下灘血乾左…又例如東和會（我諗係日本黑幫）會長花園個亭入面，係一張摺木檯同兩張摺木椅，可能真係冇budget都咁… 太多太多睇唔過眼既地方，不能盡錄。 =========================